Гудамж төслийн ажлууд Нийслэлийн бүтээн байгуулалтын дээд шагнал хүртлээ

Улаанбаатар хотын нийгэм, эдийн засгийн хөгжилд шинэ жишиг авчирсан, дэлхийн стандартад хүрсэн шилдэг бүтээн байгуулалтад олгох “НИЙСЛЭЛИЙН БҮТЭЭН БАЙГУУЛАЛТЫН ДЭЭД ШАГНАЛ”-ын эзэд тодорч, хаш чулуун суурь бүхий “Хангарьд” цом гардан авлаа. Энэ жилээс эхлэн нийслэлийн өдрөөр олгохоор болсон “Нийслэлийн бүтээн байгуулалтын дээд шагнал”-д дөрвөн төрлөөр 21 бүтээн байгуулалт нэр дэвшсэн юм.

Ингээд “Автозам, замын байгууламжийн бүтээн байгуулалт” төрөлд “Тотал Инж”, “Наранбулаг Хан”, “Экспресс зам”, “Хурдны зам” ХХК-ийн тус тус гүйцэтгэсэн автозамын бүтээн байгуулалтууд болон Хүй долоон худагт 15 компанийн хамтран барьсан 8.5 км автозам, 7000 автомашины зогсоол, 6 га бүхий үйлчилгээний талбайн ажлууд нэр дэвшсэнээс Улаанбаатар хотын автозамын сүлжээг сайжруулж, замын түгжрэлийг бодитоор бууруулах үйлсэд үнэтэй хувь нэмэр оруулсан “Экспресс зам” ХХК-ийн 1-р хорооллын арын замыг Гэмтлийн эмнэлгийн замтай холбосон шинэ 4 замын уулзвар, түшиц хана бүхий замын байгууламж шалгарч “НИЙСЛЭЛИЙН БҮТЭЭН БАЙГУУЛАЛТЫН ДЭЭД ШАГНАЛ”-ын эзэд боллоо. Энэхүү ажил нь “Гудамж” төслийн хүрээнд өргөтгөн шинэчилж буй 33 уулзварын нэг билээ.

Түүнчлэн, ЭЗХЯ-наас хэрэгжүүлж буй “Гудамж” төсөл, Япон улсын “Жей Эф И инженеринг” корпорацийн гүйцэтгэсэн “Нарны гүүр” төсөл “Тусгай шагнал” хүртлээ. Мөн энэ үеэр “Гудамж” төслийг санаачлагч Эдийн засгийн хөгжлийн сайд Н.Батбаяр, “Эм Си Эс” группийн ерөнхийлөгч Ж.Од, “Экспресс зам” ХХК-ийн захирал Э.Чинбат нарыг Улаанбаатар хотын бүтээн байгуулалт, нийгэм эдийн засгийн зорилтыг амжилттай хэрэгжүүлэн төр захиргааны ажлыг боловсронгуй болгох, иргэдийн ая тухтай амьдрах нөхцөлийг бүрдүүлэхэд онцгой хувь нэмэр оруулсан хэмээн үнэлж, НИТХТ-ийн тогтоолоор Нийслэлийн дээд шагнал “Хангарьд” одонгоор шагнасан юм.

Шилдэг бүтээн байгуулалтын “Барилга, байгууламж” төрөлд “Вива сити” залуусын хороолол, “Ривер Гарден” хотхон, “Дүнжингарав” худалдааны төв, “Туушин” барилга, “Блю Мон” үйлчилгээний барилгууд нэр дэвшсэнээс залуу гэр бүлийг хямд, тохилог орон сууцаар хангаж, орчны тохижилтийг бүрэн шийдсэн “Вива сити” залуусын хороолол, “Дэвшилтэт техник, технологи бүхий шинэ үйлдвэр” төрөлд “Монгол Фүүд”, “Улаанбаатар БҮК”, “Ахуй мандал”, “Эрэл”, “Ялгуусан” ХХК-ийн үйлдвэрүүд нэр дэвшсэнээс шинэ техник, технологийг үйлдвэрлэлдээ нэвтрүүлсэн Авто замын хашлага, ус зайлуулах шугам лотк үйлдвэрлэлийн “Улаанбаатар БҮК” ХК, “Дэд бүтэц, инженерийн байгууламж” төрөлд “Койка”-ийн буцалтгүй тусламжаар хэрэгжиж байгаа Яармагийн шинэ хорооллын цэвэр усан хангамж төсөл, “Вива сити” ХХК Хонгилын системийн ажил, “Мотор сервис” 100 айл Сэлбийн гол дээр баригдсан төмөрбетон хос гүүрийн шинэчлэлтийн ажлууд нэр дэвшсэнээс нийслэлийн цэвэр усны нөөцийг нэмэгдүүлэх, ард иргэдийг ундны усаар хангахаар ажиллаж байгаа Яармагийн шинэ хорооллын цэвэр усан хангамж төсөл тус тус шалгарлаа.

Шалгаруулалтыг Нийслэлийн Засаг даргын Тамгын газар, Захирагчийн ажлын алба, Ерөнхий төлөвлөгөөний газар, Мэргэжлийн хяналтын газар, Зураг төслийн хүрээлэн, эрдэм шинжилгээ судалгааны төрийн бус байгууллага, мэргэжлийн холбоод, иргэдийн төлөөллөөс бүрдсэн ажлын хэсэг болон олон нийтээс ирсэн саналыг үндэслэн шалгаруулсан байна. Шалгарсан бүтээлүүд нь 2013 онд шинээр ашиглалтад орсон, үр дүн нь ард иргэдэд шууд хүрсэн, тухайн бүтээн байгуулалт нь нийслэлийнхний аж амьдралд онцгой нөлөө үзүүлсэн, дэлхийн түвшний стандартыг нэвтрүүлсэн гэх мэт олон талт шалгуур үзүүлэлтийг хангажээ.